【抗疫2022】Netflix 3月片單推介 留喺屋企實有嘢睇！

而家日日確診數字都不斷創新高，關於疫情嘅新聞每分每秒都令人好壓抑。喺呢個環境下，除咗必要嘅外出，相信大家都會選擇留喺屋企抗疫。

做好一切準備去應對突發情況之後，其實適時放鬆返心情都係好重要嘅，煲劇同睇戲應該係打發時間嘅好選擇。所以小薯仔都揀咗幾套近排喺 Netflix 上討論度都幾高 / 即將上架嘅節目推介畀大家，希望可以幫到各位解下悶！


《創造安娜》(Inventing Anna)
預告：https://www.youtube.com/watch?v=tyi0C5dS_WU
Netflix 喺 2 月 11 號就首播咗呢套一共 9 集嘅美國迷你網絡劇集。改編自一位美國記者 Jessica Pressler 喺《紐約》雜誌 (“New York”) 上所發表一篇名為 “How Anna Delvey Tricked New York's Party People” 嘅文章。



故事講述由 Julia Garner 飾演嘅 Anna Delvey，本身係 Instagram 嘅紅人，不過佢就冒充一位德國富豪嘅財產繼承人，一步一步成為紐約矚目嘅社交圈名媛。而喺成為名媛嘅呢段時間，其實佢詐騙咗身邊嘅人，甚至銀行呢啲大企業一大筆錢。而由 Anna Chlumsky 飾演嘅記者 Vivian Kent 偶然得知呢件事後，就開始著手調查，最後當然就畀佢搵到大量證據，送咗 Anna Delvey 入監獄。

而現實中嘅 Anna Delvey，原名係 Anna Sorokin，跟屋企人由俄羅斯移居德國。2019 年被紐約最高法院裁定多項盜竊罪成。雖然已經喺 2021 年 2 月刑滿釋放，不過 6 個星期後就被美國移民局以簽證過期為由拘留至而家，仲等緊需唔需要被遣返去德國。但係佢並冇因為咁而低調，反而重新活躍喺社交媒體之上，仲同以前嘅好朋友，亦係受害人之一嘅 Rachel Williams 隔空「開火」。


劇中嘅其他人物，好似係同 Anna 組成「騙子情侶檔」嘅 Chase，喺劇中嘅角色設定係混合咗唔少現實中嘅人物虛構出嚟，而名媛之一嘅 Nora 同 Talia ，其實都係多位現實受害者混合而成嘅虛構人物。


《金魚妻》(Fishbowl Wives)
預告：https://www.youtube.com/watch?v=LNHd8OBXYeE
呢套係 Netflix 嘅原創日劇，改編自日本漫畫家黑澤 R 的 18 禁同名人氣作品，一共有 8 集。


劇集以「金魚」貫穿，講述住喺高級頂樓公寓嘅 6 位人妻，分別係「金魚妻」、「外包妻」、「便當妻」、「陪跑妻」、「頭痛妻」同「裝修妻」，佢哋都因為婚姻嘅不圓滿而痛苦，但係藉住一啲偶然，最後跨越咗嗰條禁忌界線，各自同外遇對象展開婚外情。而故事就由篠原涼子飾演嘅家庭主婦 平賀櫻、岩田剛典飾演嘅金魚舖老闆 春斗，仲有安藤政信飾演嘅美容院老闆 平賀卓彌為主軸。

其他出演嘅演員仲包括長谷川京子、松本若菜、中村靜香、瀨戶沙織、石井杏奈、真島秀和、藤田慎吾、犬飼貴丈同久保田悠來。

而劇中大膽嘅情慾場面，以及台詞，例如係「男人最有性趣嘅，永遠係人哋老婆。」，都引起咗廣大觀眾討論。

唔講唔知，其實本身《金魚妻》漫畫裡面嘅情慾場面，尺度更加大，而且更加直接同赤裸。


《國王豪華音樂節》(Fyre: The Greatest Party That Never Happened)
預告：https://www.youtube.com/watch?v=2UWmE8Ei18k
詐騙手法真係層出不窮。上面提過嘅改編劇集《創造安娜》係呢個題材，繼續被討論緊嘅真人紀錄片《Tinder 詐騙王》係呢個題材，而呢套 2019 年嘅紀錄片都係呢個題材。

紀錄片內一眾參與者 (同時都係受害人) 所講述嘅 Fyre 音樂節，係由 Fyre 媒體公司 CEO Billy McFarland 同歌手 Ja Rule 共同舉辦嘅音樂節，原定喺巴哈馬一個叫 Exuma 嘅島舉行，目的係推廣 Fyre 呢間公司旗下一個同名應用程式，呢個程式聲稱可以簡化預約音樂人同藝人出席表演或活動嘅手續。

音樂節一開始搵咗唔少網絡紅人同超級名模去個島上面玩，再叫佢哋影相擺上社交平台幫佢宣傳，又話會請好多大卡士嚟表演，吸引到唔少廣告商贊助，仲話買 VIP 門票會包食包住包娛樂，所以有唔少人都願意畀高價買門票入場。

不過呢個活動其實係面臨好多問題，包括安全、食物、住宿、醫療服務同藝人邀請等，導致無限期推遲，最後仲取消埋。而畀錢買飛嘅人，去到現場先知道，呢場活動標榜嘅所有嘢係乜都冇，只有浸水嘅帳篷、仲搭緊嘅舞台同埋三文治。於是佢哋之後就向法院提出集體訴訟，告 Billy McFarland 欺詐，而 Billy 最後都罪名成立，亦被法院判咗刑。


即將上架
3 月 9 日：《粉雄救兵：德國篇》
本來嘅《粉雄救兵》喺 2007 年已經播放完畢，而 2018 年 Netfix 宣佈再做呢個真人騷節目，並且搵咗全新嘅閃耀五人組 (Fab 5) 主持，2019 年仲去埋日本做特輯㖭～不過嚟到《粉雄救兵：德國篇》，因為去咗德國，所以就同喺美國嘅 Fab 5 唔同，但係呢 5 位主持都係各有所長，分別精通生活、時尚、美妝、健康同設計，幫德國嘅參加者改造佢哋嘅人生。

3 月 18 日：《華燈初上》第三季
預告：https://www.youtube.com/watch?v=7knKRg9Ma3w
第一、二季都有好高討論度，連唔少藝人都話自己有睇嘅台劇《華燈初上》，第三季將會喺 18/3 上架！

故事發生喺 1988 年，台灣紅燈區嘅一間非常多人幫襯嘅日式酒店「光」裡面，圍繞林心如飾演嘅羅雨儂，同楊謹華飾演嘅蘇慶儀兩位老闆娘，同佢哋旗下一班風情萬種嘅酒店小姐，各人之間嘅愛恨情仇。第一季嘅 8 集係喺一宗命案發生前嘅故事，而第二季嘅 8 集就會比較集中喺命案背後嘅兇手係邊個同埋佢嘅動機。至於第三季講咩？咁就要到時留意了！

其他主演嘅演員仲包括楊祐寧、鳳小岳、張軒睿、劉品言、謝瓊煖、謝欣穎同郭雪芙。


撰文：小薯仔
資料來源：Netflix 頁面、維基百科、媒體報導
照片來源：Netflix 頁面、Inventing Anna Instagram、imdb、華燈初上 Facebook

---

延伸閱讀：
【睇YouTube】MIRROR成員嘅YouTube頻道有咩睇？
https://timable.com//zh-hk/blog/2140181

【睇YouTube】鄭中基YouTube 頻道「機動電視台 RTV」有咩睇？
https://timable.com//zh-hk/blog/2128791


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app