【抗疫2022】Netflix 3月片单推介 留喺屋企实有嘢睇！

而家日日确诊数字都不断创新高，关于疫情嘅新闻每分每秒都令人好压抑。喺呢个环境下，除咗必要嘅外出，相信大家都会选择留喺屋企抗疫。

做好一切准备去应对突发情况之后，其实适时放松返心情都系好重要嘅，煲剧同睇戏应该系打发时间嘅好选择。所以小薯仔都拣咗几套近排喺 Netflix 上讨论度都几高 / 即将上架嘅节目推介畀大家，希望可以帮到各位解下闷！


《创造安娜》(Inventing Anna)
预告：https://www.youtube.com/watch?v=tyi0C5dS_WU
Netflix 喺 2 月 11 号就首播咗呢套一共 9 集嘅美国迷你网络剧集。改编自一位美国记者 Jessica Pressler 喺《纽约》杂志 (“New York”) 上所发表一篇名为 “How Anna Delvey Tricked New York's Party People” 嘅文章。



故事讲述由 Julia Garner 饰演嘅 Anna Delvey，本身系 Instagram 嘅红人，不过渠就冒充一位德国富豪嘅财产继承人，一步一步成为纽约瞩目嘅社交圈名媛。而喺成为名媛嘅呢段时间，其实渠诈骗咗身边嘅人，甚至银行呢啲大企业一大笔钱。而由 Anna Chlumsky 饰演嘅记者 Vivian Kent 偶然得知呢件事后，就开始着手调查，最后当然就畀渠搵到大量证据，送咗 Anna Delvey 入监狱。

而现实中嘅 Anna Delvey，原名系 Anna Sorokin，跟屋企人由俄罗斯移居德国。2019 年被纽约最高法院裁定多项盗窃罪成。虽然已经喺 2021 年 2 月刑满释放，不过 6 个星期后就被美国移民局以签证过期为由拘留至而家，仲等紧需唔需要被遣返去德国。但系渠并冇因为咁而低调，反而重新活跃喺社交媒体之上，仲同以前嘅好朋友，亦系受害人之一嘅 Rachel Williams 隔空「开火」。


剧中嘅其他人物，好似系同 Anna 组成「骗子情侣档」嘅 Chase，喺剧中嘅角色设定系混合咗唔少现实中嘅人物虚构出嚟，而名媛之一嘅 Nora 同 Talia ，其实都系多位现实受害者混合而成嘅虚构人物。


《金鱼妻》(Fishbowl Wives)
预告：https://www.youtube.com/watch?v=LNHd8OBXYeE
呢套系 Netflix 嘅原创日剧，改编自日本漫画家黑泽 R 的 18 禁同名人气作品，一共有 8 集。


剧集以「金鱼」贯穿，讲述住喺高级顶楼公寓嘅 6 位人妻，分别系「金鱼妻」、「外包妻」、「便当妻」、「陪跑妻」、「头痛妻」同「装修妻」，渠哋都因为婚姻嘅不圆满而痛苦，但系借住一啲偶然，最后跨越咗嗰条禁忌界线，各自同外遇对象展开婚外情。而故事就由筱原凉子饰演嘅家庭主妇 平贺樱、岩田刚典饰演嘅金鱼舖老板 春斗，仲有安藤政信饰演嘅美容院老板 平贺卓弥为主轴。

其他出演嘅演员仲包括长谷川京子、松本若菜、中村静香、濑户沙织、石井杏奈、真岛秀和、藤田慎吾、犬饲贵丈同久保田悠来。

而剧中大胆嘅情欲场面，以及台词，例如系「男人最有性趣嘅，永远系人哋老婆。」，都引起咗广大观众讨论。

唔讲唔知，其实本身《金鱼妻》漫画里面嘅情欲场面，尺度更加大，而且更加直接同赤裸。


《国王豪华音乐节》(Fyre: The Greatest Party That Never Happened)
预告：https://www.youtube.com/watch?v=2UWmE8Ei18k
诈骗手法真系层出不穷。上面提过嘅改编剧集《创造安娜》系呢个题材，继续被讨论紧嘅真人纪录片《Tinder 诈骗王》系呢个题材，而呢套 2019 年嘅纪录片都系呢个题材。

纪录片内一众参与者 (同时都系受害人) 所讲述嘅 Fyre 音乐节，系由 Fyre 媒体公司 CEO Billy McFarland 同歌手 Ja Rule 共同举办嘅音乐节，原定喺巴哈马一个叫 Exuma 嘅岛举行，目的系推广 Fyre 呢间公司旗下一个同名应用程式，呢个程式声称可以简化预约音乐人同艺人出席表演或活动嘅手续。

音乐节一开始搵咗唔少网络红人同超级名模去个岛上面玩，再叫渠哋影相摆上社交平台帮渠宣传，又话会请好多大卡士嚟表演，吸引到唔少广告商赞助，仲话买 VIP 门票会包食包住包娱乐，所以有唔少人都愿意畀高价买门票入场。

不过呢个活动其实系面临好多问题，包括安全、食物、住宿、医疗服务同艺人邀请等，导致无限期推迟，最后仲取消埋。而畀钱买飞嘅人，去到现场先知道，呢场活动标榜嘅所有嘢系乜都冇，只有浸水嘅帐篷、仲搭紧嘅舞台同埋三文治。于是渠哋之后就向法院提出集体诉讼，告 Billy McFarland 欺诈，而 Billy 最后都罪名成立，亦被法院判咗刑。


即将上架
3 月 9 日：《粉雄救兵：德国篇》
本来嘅《粉雄救兵》喺 2007 年已经播放完毕，而 2018 年 Netfix 宣布再做呢个真人骚节目，并且搵咗全新嘅闪耀五人组 (Fab 5) 主持，2019 年仲去埋日本做特辑㖭～不过嚟到《粉雄救兵：德国篇》，因为去咗德国，所以就同喺美国嘅 Fab 5 唔同，但系呢 5 位主持都系各有所长，分别精通生活、时尚、美妆、健康同设计，帮德国嘅参加者改造渠哋嘅人生。

3 月 18 日：《华灯初上》第三季
预告：https://www.youtube.com/watch?v=7knKRg9Ma3w
第一、二季都有好高讨论度，连唔少艺人都话自己有睇嘅台剧《华灯初上》，第三季将会喺 18/3 上架！

故事发生喺 1988 年，台湾红灯区嘅一间非常多人帮衬嘅日式酒店「光」里面，围绕林心如饰演嘅罗雨侬，同杨谨华饰演嘅苏庆仪两位老板娘，同渠哋旗下一班风情万种嘅酒店小姐，各人之间嘅爱恨情仇。第一季嘅 8 集系喺一宗命案发生前嘅故事，而第二季嘅 8 集就会比较集中喺命案背后嘅凶手系边个同埋渠嘅动机。至于第三季讲咩？咁就要到时留意了！

其他主演嘅演员仲包括杨佑宁、凤小岳、张轩睿、刘品言、谢琼暖、谢欣颖同郭雪芙。


撰文：小薯仔
资料来源：Netflix 页面、维基百科、媒体报导
照片来源：Netflix 页面、Inventing Anna Instagram、imdb、华灯初上 Facebook

---

延伸阅读：
【睇YouTube】MIRROR成员嘅YouTube频道有咩睇？
https://timable.com//zh-hk/blog/2140181

【睇YouTube】郑中基YouTube 频道「机动电视台 RTV」有咩睇？
https://timable.com//zh-hk/blog/2128791


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下载Timable App，随时随地捕捉本地活动资讯
iOS/Android：https://bit.ly/timable_app