【睇YouTube】MIRROR成員嘅YouTube頻道有咩睇？

越嚟越多人都鍾意開返個 YouTube 頻道，拍下各種唔同嘅片再上傳同大家分享。除咗全職嘅YouTuber 之外，亦有唔少藝人會開設屬於佢哋自己嘅頻道，拍下 vlog，同粉絲分享下工作上嘅幕後故事或者係揀一啲有趣嘅主題嚟拍片。

近年人氣旺盛嘅 MIRROR 都唔例外，團體官方嘅頻道以上傳歌曲 MV 為主 (出道初期都有「100 問」呢類了解成員嘅主題)，不過當中有開自己 YouTube 頻道嘅成員，雖然都係不定期出片，但係影片主題就唔止限於音樂，相對上就比較多元化少少～

一齊嚟睇下到目前為止有咩成員有開個人頻道啦：

1. 以成員英文名之順序排列
2. 放出嚟嘅影片有小薯仔主觀推介嘅，亦有喺該頻道裡面觀看次數相對較多嘅
3. 由於篇幅所限，未能擺上每段影片嘅示意圖，敬請見諒


Alton 王智德
Youtube 頻道：ALTON WONG ( https://www.youtube.com/c/ALTONWONGZ ）
個人 IG：https://www.instagram.com/altonwongz
Alton 喺頻道中上傳嘅影片其實都幾多唔同種類，有 vlog、有一啲「小劇場」、有講下之前人氣強勁嘅 “ Clubhouse” 應用程式，甚至會「惡搞」MIRROR 成員個人歌曲嘅 MV。

[認真做咩野] 系列
https://www.youtube.com/playlist?list=PL4kAKgKWHc9LSc3Bx2QfWS0NXjKrIeFcu
呢個系列放咗一啲佢好認真亦好享受做，但係其實可能人哋會覺得係無聊嘢嘅事。


特_登 - Alton, Lokman, Tiger@MIRROR
https://www.youtube.com/watch?v=bAlukpBpG8k
上面提過 Alton 會「惡搞」MIRROR 成員個人歌曲嘅 MV，呢條片就係其中之一！以成員 Anson Kong 江𤒹生 (AK) 喺 2020 年推出嘅個人單曲〈特登〉為靈感，邀請咗隊長 Lokman 同成員 Tiger 一齊組成「雨天家族」，拍攝咗呢條叫「特_登」嘅片！而原本嘅主角 AK 都有喺片中參與演出，另外都仲有一位 MIRROR 成員出現㗎～

姜濤 Alton 首支合作單曲 蒙着嘴說 _ _
https://www.youtube.com/watch?v=0p_OtlOfDpc
呢條只係 1 分鐘嘅片，好似 Alton 自己喺原本嘅影片標題所講，係一段彩蛋。拍低咗 2021 年 MIRROR 演唱會後台，佢喺姜濤唱緊〈蒙著嘴說愛你〉嗰陣，唱咗一小段呢首歌曲嘅改詞版。小薯仔覺得幾過癮同「啜核」，唔知又會唔會引起大家嘅共鳴呢？

六分鐘 Work Out 片原來好辛苦!? Dua Lipa - Let's Get Physical Work Out Video COVER
https://www.youtube.com/watch?v=5bIG60kJJWM
呢條片佢搵咗一班朋友，包括幾位 MIRROR 嘅成員，一齊玩，仲自己做埋導演同剪片。片下面嘅留言都話同 Dua Lupa 嘅原片相比，還原度近乎 100%～而家成日都留喺屋企，不妨一路睇呢條片一路郁下自己嘅身體，跟佢哋做個小小嘅 Work Out 呀！

[卡關直播] 系列
https://www.youtube.com/playlist?list=PL4kAKgKWHc9LPekW8IafnfdHC-PLwKhcl
其實佢嘅頻道有個好大特點，就係有時間嘅時候，會直播自己打機，畀蛋白粉 (Alton 粉絲名稱) 同佢一齊經歷遊戲世界，打緊機嘅同時都會讀下留言，同佢哋交流下！有時又會將啲遊戲角色改名，等睇緊佢直播嘅觀眾容易記得之餘，都可以一齊投入～

不過同大部分玩家所開嘅打機直播一樣，佢嘅打機片時長多數都喺個幾至兩個幾鐘內，所以如果想睇曬全場，喺自己比較多空閒時間嗰陣撳入去就會比較好。


Anson Kong 江𤒹生 (AK)
Youtube 頻道：Anson Kong ( https://www.youtube.com/c/ansonkong1016 )
個人 IG：https://www.instagram.com/_kisang_
Anson Kong 嘅 Youtube 頻道，上傳影片嘅種類相對上亦算係比較多，除咗工作嘅幕後花絮同 vlog，亦有一啲歌曲翻唱，同搵埋 MIRROR 成員一齊玩遊戲。


Anson KIS'chen系列
https://www.youtube.com/playlist?list=PLoRuSWBe5dm4xRIWKo_aHD1vmwPnq_oZL
煮嘢食係佔 AK 頻道影片數量最多嘅一個題材！佢亦幫呢個煮嘢食嘅系列命名為 “Anson KIS'chen”。

今晚廚房邊個話事｜江陳記廚房｜三餸一湯煮飯篇
https://www.youtube.com/watch?v=_B4OuidCUb4
呢條片搵咗 MIRROR 成員 Ian 陳卓賢嚟一齊「煮飯仔」！由買到煮，都係佢哋兩個一齊分工合作。喺煮飯嘅過程中，當然亦唔少得佢哋互相鬥嘴嘅部份啦～

其實未諗到食咩嘅大家，睇片除咗睇人之外，都可以睇嚟攞下靈感 (不過而家買唔買到材料就小薯仔都唔敢講)。

其他
友情撳鐘仔 ft. Lokman, Tiger
https://www.youtube.com/watch?v=TH0Tt6VedCk
友情撳鐘仔 ft. Alton, Frankie, Lokman, Tiger@MIRROR
https://www.youtube.com/watch?v=uBis1N003mw

全民造星1問答大會
https://www.youtube.com/watch?v=U27BOuy_LWs
「友情撳鐘仔」嘅兩條片，仲有「全民造星1問答大會」亦都係搵咗 MIRROR 嘅成員嚟一齊拍，透過問答睇下大家了唔了解對方～

「友情撳鐘仔」裡面問嘅問題，都會由佢哋自己預先寫低答案；「全民造星1問答大會」當然就係同佢哋參加《全民造星》當時經歷過嘅嘢有關啦，答完問題會有「懲罰壽司」，成員 Frankie 亦因為呢條片而獲得「化學老師」嘅別名㖭～

如果想了解多啲佢哋的話，撳入去睇都係個好選擇嚟㗎！


Anson Lo 盧瀚霆
Youtube 頻道：Anson Lo ( https://www.youtube.com/c/AnsonLoHonTing )
個人 IG：https://www.instagram.com/ansonlht
喺 Anson Lo Youtube 頻道上傳嘅影片中，雖然都會有啲小遊戲，但係比較多嘅會係記錄日常生活嘅vlog、關於佢嘅 Q&A，同工作幕後花絮呢幾類題材嘅片，可以畀「神徒」(Anson Lo 粉絲名稱) 睇到更多佢喺舞台下嘅面貌。

神徒與教廚系列
https://www.youtube.com/playlist?list=PL7MkTCIjapGrOensGBdIhH7NZyzhSl5eK
睇個名都知呢個系列其實都係有關煮嘢食嘅。Anson Lo 跳舞唱歌就睇得多，可以透過呢個系列睇下佢入廚房嗰陣係咩樣～

【神徒與教廚】Edan教主大比拼
https://www.youtube.com/watch?v=U27BOuy_LWs
呢條片嚟講呢，應該係小薯仔睇過最「精彩」嘅一段煮食片。Anson Lo 喺片中嘅「原塊煎冬瓜」同「倒曬成樽鹽」，仲有 MIRROR 成員 Edan 嘅「徒手搾西瓜」，相信都係粉絲心目中嘅「經典之作」。

其他
幫家姐化妝
https://www.youtube.com/watch?v=Ucc3IaWbVdw
有兄弟姊妹嘅大家，相信唔嗌交已經算關係好好，更遑論會幫佢哋化妝呢啲啦。不過 Anson Lo 呢條片就邀請咗自己嘅親家姐出演，仲挑戰幫佢化妝！當然佢家姐都唔係只係坐低畀佢化妝咁簡單，亦講咗好多 Anson Lo 嘅秘密～

《愚人節特輯》打電話意外流岀秘密？(ft. 姜濤 Edan 教母)
https://www.youtube.com/watch?v=HMMosYNyQPY
喺愚人節，應該都會同過身邊嘅人開一啲玩笑。而 Anson Lo 亦喺愚人節打電話同 MIRROR 成員姜濤、Edan，仲有自己媽媽玩咗個小遊戲，想佢哋講出一啲佢預設咗嘅答案～雖然唔係每個人都成功，不過 3 位都好認真聽呢個電話。


Edan 呂爵安
Youtube 頻道：Edan Lui 呂爵安 ( https://www.youtube.com/channel/UCP8e0aRdQLQKSQwFeXIlkQQ )
個人 IG：https://www.instagram.com/edanlui
Edan 喺 Youtube 頻道上傳嘅影片，早期以《全民造星》裡面，自己有份嘅表演仲有出道後嘅 MIRROR 團體綜藝節目《MIRROR GO》嘅一啲片段剪輯為主。

不過而家就多數都係 vlog 同工作上嘅幕後花絮，而且佢仲幫工作花絮呢個題材嘅片，改咗個系列名叫「跟我去返工」㖭～


5000$一堂鋼琴名師MR.LUI親授JEREMY音樂知識
https://www.youtube.com/watch?v=UZCIhKl5g8Y
有留意 Edan 嘅朋友，都會知道佢識彈鋼琴。所以喺呢條片裡面 MIRROR 成員 Jeremy 就化身「李同學」，搵呢位「鋼琴名師」上返堂音樂堂，教彈琴。最後「鋼琴名師」仲挑戰 1 分鐘練指定嘅曲目，話要畀「李同學」睇下啱啱開始學琴嘅新手同有返咁上下資歷嘅熟手喺睇譜同彈琴上有咩分別。

[越級挑戰] 仲6秒9句英文？直接挑戰6秒10句英文！！
https://www.youtube.com/watch?v=8gbpK-Xa4_E
呢條 4 分鐘左右嘅片，佢就搵咗媽媽同妹妹協助拍攝。雖然短短哋，不過都幾好笑，仲有個反轉喺裡面～

之前吳君如喺《闔家辣》宣傳訪問嗰陣都有提過因為睇到 Edan 嘅 YouTube 片，覺得佢好笑，先搵佢去呢套戲試鏡。唔知呢條片又會唔會係其中一條呢？

[跟我去返工EP.10] 史上尺度最大！！膠戰S2 冬季旅行VLOG！！
https://www.youtube.com/watch?v=HmVqqxTsfHE
《膠戰》呢個 ViuTV 嘅節目，兩季都帶咗唔少笑料畀觀眾，有睇都知 6 位夾埋一齊就好多笑聲，呢條記錄咗佢同其他 5 位「膠人」拍節目第 2 季最後集數嗰陣喺鏡頭後嘅片，會令人期待下一季！


Jer 柳應廷
Youtube 頻道：柳應廷 JEREMY LAU ( https://www.youtube.com/user/JEREMYxLAU )
個人 IG：https://www.instagram.com/jeremylaous
身為 MIRROR 其中一位主唱嘅 Jer，佢嘅 Youtube 頻道相比起其他成員，上傳影片嘅數量就比較少，而題材方面都係以音樂為主，多數都係歌曲 cover，仲有唱歌嘅直播。

JEREMYLAOUS MUSIC LIVE #2 大海
https://www.youtube.com/watch?v=TQOGzG7cuoY
例如呢個以「大海」為主題嘅唱歌直播，佢提前喺社交平台上收集咗大家一啲關於海嘅故事或者回憶，再喺直播中讀返出嚟，又分享咗一啲自己嘅故事。當然唔少得揀咗幾首點唱，亦同樣同海有關嘅歌曲唱啦！

銀髮白 - 柳應廷 x 吳林峰 (cover)
https://www.youtube.com/watch?v=JwC3WZjdDec
呢條片佢搵嚟吳林峰，同佢一齊 cover 林二汶同 Yoyo 岑寧兒原唱嘅〈銀髮白〉。(小薯仔私心覺得好好聽！)


(左：Stanley，右：Jeremy)

Stanley 邱士縉 & Jeremy 李駿傑
Youtube 頻道：巨龍與豬仔 Stanley & Jeremy（https://www.youtube.com/c/%E5%B7%A8%E9%BE%8D%E8%88%87%E8%B1%AC%E4%BB%94StanleyJeremy）
個人 IG：
Stanley - https://www.instagram.com/stanleysc_
Jeremy - https://www.instagram.com/jeremy_0908
Stanley 自稱「馬鞍山巨龍」，而佢覺得 Jeremy 好親切，又好鍾意 sweet 咁叫佢，所以就叫佢「豬仔」。「巨龍」同「豬仔」加埋一齊就變咗頻道名。佢哋嘅 Youtube 頻道都係 MIRROR 裡面暫時由兩位成員一齊經營嘅～

而上傳嘅影片種類，以 vlog 為主，但係都有玩下遊戲同唔同嘅體驗，好似係去調酒同畫畫等。

調教你金jer成為遊戲王
https://www.youtube.com/watch?v=irdF5fKDxgc
調教你金jer成為遊戲王 #2
https://www.youtube.com/watch?v=5ml_IG4b-58
呢兩條片搵咗 MIRROR 成員 Jer 上嚟同佢哋玩下遊戲，同時 Jer 都係頻道開始營運之後嘅第 1 個嘉賓～

天才劍神爭霸戰
https://www.youtube.com/watch?v=V4hLuD_Wag8
上面提到佢哋其實都有喺片裡面有啲唔同嘅嘗試同體驗。呢條片佢哋就去咗玩花劍，仲請到劍擊港隊運動員崔浩然嚟教佢哋！最後發現 Jeremy 有成為劍擊手嘅潛質，而 Stanley 就有成為旁述嘅天賦。

值得一提嘅係，Jeremy 另外都有自己嘅 Youtube 頻道 (李駿傑Jeremy Lee - https://www.youtube.com/channel/UCv0mlc3LIUfJ-vZ4Mg6Elbg ) 㗎！不過佢嘅頻道暫時唔算好多片，都係歌曲嘅 cover 佔多。

雖然 MIRROR 成員嘅 Youtube 頻道未必好似其他頻道一樣成日有新嘅影片發佈，但係小薯仔都希望，嚟緊都可以睇下佢哋拍更多類型嘅片！

撰文：小薯仔
照片來源：Anson Kong YouTube 上載之影片截圖；Alton、Anson Kong、Anson Lo、Edan、Jer、Stanley 及 Jeremy Instagram

---

延伸閱讀：
【鏡仔101】MIRROR 成員中學/大學母校一覽
https://timable.com//zh-hk/blog/2170029

MIRROR成員5個服裝品牌 各有各風格
https://timable.com//zh-hk/blog/2154905

【睇YouTube】Alton x Anson Kong 新歌〈REBOUND〉｜MIRROR 團體同成員單曲MV 有咩睇？
https://timable.com//zh-hk/blog/2141832

【睇電視2022】ViuTV 籃球劇《季前賽》睇MIRROR同ERROR喺球場上揮灑汗水！
https://timable.com//zh-hk/blog/2128581

【睇電視2022】ViuTV 新運動劇《i.SWIM》繼續青春熱血！
https://timable.com/zh-hk/blog/2126092


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app