【香港行山郊遊2022】新手必行！5大輕鬆簡單港島行山路線
作者: Timable, 2021年8月10日 (二) 上午8時50分
終於可以除口罩啦，當然要去行山，冇罩感受吓大自然嘅氣息啦！行山嘅同時仲可以睇埋風景打卡，校啱時間仲可以欣賞日出同日落，既然未有得去旅行，一於就行吓山當出走啦！今次為大家推介5條超級好行嘅行山路線，最適合同屋企人或者情人知己一齊去，一邊傾吓無聊趣事，一邊感受大自然嘅氣息，chill住過週末。
港島區行山點 1. 香港仔自然教育徑
香港仔自然教育徑算係比較平坦容易行，初段環繞香港仔下水塘而行，有唔同嘅打卡位可以影靚相，沿途仲可以眺望香港仔避風塘嘅景色。值得一提嘅係，上水塘水壩已被列為法定古蹟，去到記得睇吓啦！
難度︰★✩✩✩✩
全長︰約1.2公里
時間︰約1小時
前往交通方式：
可乘搭公共交通工具前往「漁光村海鷗樓」巴士站附近，沿香港仔水塘道上行10分鐘，到達香港仔郊野公園入口，從右邊小路再走5分鐘就便到達位於香港仔下水塘的自然教育徑起點。
城巴路線 - 7 及 76
新巴路線 - 95 及 971
專線小巴路線 - 4A, 4B, 4C, 4S 及 52
公共小巴 - 香港仔至石排灣線
離開交通方式：
教育徑的終點位於香港仔上水塘的主壩，巿民可以沿香港仔水塘道步行約 30分鐘回漁光道巴士站乘車離去。
城巴路線 - 7及76
新巴路線 - 95及971
港島區行山點 2. 大潭篤水塘石橋
要睇香港殖民時代嘅建築，當然要去大潭水塘啦！大潭水塘由大潭上水塘、大潭副水塘、大潭中水塘及大潭篤水塘組成，擁有22個百年歷史嘅法定古蹟。水塘內嘅四座拱型石橋，以及石橋在湖上嘅倒影係最令人驚歎，呢啲維多利亞式古橋全部都係一級歷史建築。水塘內嘅石砌輸水道、水掣房及水壩等古蹟，都好值得大家去欣賞同影吓相㗎！
路線：
鰂魚涌A出口 >>> 英皇道 >>> 柏架山道自然徑 >>> 林邊生物多樣性自然教育中心 >>> 見到樹木研習徑轉右 >>> 分叉口轉右 >>> 分叉口轉左 >>> 柏架山雷達站轉右 >>> 大潭水塘
難度︰★✩✩✩✩
全長︰約8.5公里
時間︰約3小時
前往交通方式：
可乘搭公共交通工具前往「大潭郊野公園」巴士站。下車後，過對面馬路便是大潭郊野公園入口。
新巴路線 – 14
專線小巴路線 – 16A, 16M 及 16X
離開交通方式：
大潭郊野公園巴士站有14號巴士往西灣河
港島區行山點 3. 爐峰自然步道(西高山段)
呢條行山路線，就好似穿過歷史迷霧跳入時光隧道咁，喺繁華嘅中環商廈與遊客不絕嘅太平山頂之間，行上古雅逸然嘅百年棧道──盧吉道。由東面鯉魚門至西面馬灣海峽，將維多利亞港盡收眼底，亦可遠眺尖沙咀鬧市景色，以及獅子山及大帽山組成嘅山巒。
西高山上更有觀景台，可以180度睇晒香港島以西一帶海域，包括青衣、大嶼山及南丫島。而沿港島徑第一段繞山南行，就係睇日落嘅好地方。行到盡頭就係香港島首座儲水庫薄扶林水塘，及超過150年歷史嘅前水塘看守員房舍。
難度︰★★✩✩✩
全長︰約4公里
時間︰約2.5小時
前往交通方式：
到達山頂後，沿山頂道向凌霄閣方向步行至盧吉道起點。
山頂纜車
新巴路線 - 15及15B
專線小巴路線 - 1
離開交通方式：
於薄扶林水塘道離開，步行約10分鐘到達薄扶林道乘搭公共交通工具離開。
新巴路線 - 4, 91, 970 及 970X
城巴路線 - 7, 37A, 40, 40M 及 71
專線小巴路線 - 22, 22S, 23, 23M, 31 及 63
港島區行山點 4. 砵甸乍山郊遊徑
呢條郊遊徑嘅優點就係交通方便，由石澳馬塘坳起步，經過引水道一段後，景色會立刻變得開揚，仲可以見到另一郊遊熱點龍脊。往西鋪展成大浪灣至石澳嘅海岸線及海灣，甚至睇到鶴咀半島，最能感受香港環海嘅景色與魅力。沿途蝶影處處，中途亦有觀海亭俾大家唞吓，欣賞清水灣半島及東龍洲嘅島嶼風景，仲有柴灣同小西灣嘅市景。
難度︰★★✩✩✩
全長︰約1.9公里
時間︰約1.5小時
前往交通方式：
乘坐巴士或專線小巴至石澳道「歌連臣角」站下車，沿路口右邊石階步行至車路後，再沿路向上步行約25分鐘便可達郊遊徑入口。
新巴路線 - 9
專線小巴路線 -16M
離開交通方式：
沿歌連臣角道步行約45分鐘到連城道，再沿路步行至環翠道後，沿地下鐵指示牌步行至柴灣地鐵站。
港島區行山點 5. 康柏郊遊徑
呢條郊遊徑沿路可以欣賞附近嘅山脈翠綠美景、鳥語花香外，亦唔難發現周圍都有奇石，小心觀察及運用想像力嘅話，可能會發現行山人士口中嘅「恐龍石」。途中更可飽覽鰂魚涌一帶之城市風貌，日落時分走在徑上，更有機會聽到貓頭鷹嘅叫聲。
難度︰★★✩✩✩
全長︰約3.3公里
時間︰約1小時15分鐘
前往交通方式：
乘搭途經英皇道的公共交通工具，於「新威園」或「鰂魚涌街」巴士站或附近下車。沿英皇道步行至鰂魚涌巿政大廈旁的柏架山道口，再沿路向上步行約45分鐘，見鰂魚涌郊野公園管理站指示牌後，轉入管理站的路口，右邊小徑即為康柏郊遊徑起點。
港鐵 - 鰂魚涌站A出口
離開交通方式：
尾段接上衛奕信徑第二段往下山方向行走，沿康怡花園旁邊的小徑接上馬路，沿基利路步行下山往英皇道，續往東行可到達港鐵太古站。
資料來源：漁農自然護理署
www.hiking.gov.hk
編：Athena
延伸閱讀：
【香港郊遊路線2022】港島熱門靚景打卡位｜輕鬆到達最啱睇日落｜週末好去處
詳情：https://timable.com/blog/2169446
【香港行山路線2022】5大輕鬆親子行山徑｜一小時行完仲有靚景打卡位｜週末好去處
詳情：https://timable.com/blog/2143466
【香港周圍遊】西貢萬宜水庫東壩壯麗景色 行山兼睇世界級地質奇觀
詳情：https://timable.com/blog/1985693
【香港遊】靚景行山路線 「破邊洲」欣賞海平線
詳情：https://timable.com/blog/1900022
Follow埋Timable FB同IG
FB：https://www.facebook.com/timable.hk
IG：https://www.instagram.com/timable/
立即下載Timable App，隨時隨地捕捉本地活動資訊
iOS/Android: https://bit.ly/timable_app
