【抗疫生活】 情人節留喺屋企 情侶活動推介

今年情人節對情侶嚟講，一定少咗好多樂趣喇，不過留喺屋企兩個人靜靜過仲Sweet喇，等小T推介有咩家中活動畀大家喇！男朋友們，記住做足準備呀，唔係女朋友會嬲嬲豬㗎！


煮飯仔
情侶們一齊留喺屋企，醫肚梗係首要喇，同女朋友齊齊煮下飯仔，就算唔識，兩個一齊跟食譜研究，一齊做同一件事，增加交流，都係促進感情同增加回憶嘅方法！


情侶檔打機
女朋友成日都唔明男仔點解咁鐘意打機，或者呢個係將女朋友變機迷嘅機會，介紹下你呢排玩緊咩Game畀佢，同佢一齊打！不過千祈唔好嫌佢係豬隊友，要有耐心！再唔係搵啲啱佢，佢又有興趣嘅PC機同佢一齊玩，增加佢對打機嘅興趣！


睇愛情電影Sweet下
雖然疫情下唔適合出街睇戲，不過都可以睇Netflix，又或者上網搵愛情戲睇，記住就算你對情情塔塔嘅戲冇興趣，都要搵定多幾套，畀佢揀！重點係陪佢睇，𠱁下佢開心！


驚喜不可少
雖然今年唔使Plan去邊度玩同Book枱，但最好都係準備定喺屋企可以做咩好，同埋買定情人節禮物，重點係畀女朋友見到你有用心準備！而唔係咩都冇諗過！就算係同平日做嘅嘢，花多少少心思，𠱁下佢喇！